وەزارەتی دارایی و ئابوری لەبارەی موچە راگەیەندراوێکی بڵاوکردەوە؛ بەغدا پابەندنەبوە

وەزارەتی دارایی و ئابوری حکومەتی هەرێم رایگەیاند، ئەمڕۆ بڕی 598 ملیار دینار لە لقی هەولێری بانکی ناوەندی عێراق ڕادەستی وەزارەتی دارایی هەرێم کراو ڕەوانەی بانکەکان کرا بەمەبەستی دابەشکردنی موچە، هەر ئەمڕۆش دابەشکردنی موچە بەوەزارەتی تەندروستی دەستپێدەکات، دەشڵێت، “حکومەتی عێراقی فیدڕاڵ و وەزارەتی دارایی عێراق بەهیچ جۆرێک پابەندنەبون بە ڕێکەوتنی نێوان هەرێم و بەغداو جێبەجێکردنی یاسای بودجەی عێراق”.

وەزارەتی دارایی و ئابوری حکومەتی هەرێمی کوردستان ئەمڕۆ چوارشەممە لە راگەیەندراوێکدا بڵاویکردەوە، کاتژمێر 9:30 خولەکی بەیانی ئەمڕۆ پێنجشەممە بڕی 598 ملیار دینار لە لقی هەولێری بانکی ناوەندی عێراق ڕادەستی وەزارەتی دارایی هەرێم کراو ڕەوانەی بانکەکان کرا بەمەبەستی دابەشکردنی موچە، هەر ئەمڕۆش دابەشکردنی موچە بەوەزارەتی تەندروستی دەستپێدەکات و خشتەی سەرجەم وەزارەتەکانیش رادەگەیەنرێت و ئەو کورتهێنانەشی دروست بوە لە داهاتی ناوخۆ پڕ دەکرێتەوە.

هەرێمی کوردستان مانگانە پێویستی بەزیاتر لە 940 ملیار دینارە تەنها بۆ موچە

ئاماژەی بەوەشکرد، هەرێمی کوردستان مانگانە پێویستی بەزیاتر لە 940 ملیار دینارە تەنها بۆ موچە، ئەوە جگە لە خەرجی بەکاردبردن و دام و دەزگاکان و بودجەی وەبەرهێنان و تێچوی بەرهەمهێنانی کارەبا.

حکومەتی فیدراڵ و وەزارەتی دارایی عێراق بەهیچ جۆرێک پابەند نەبون بە ڕێکەوتنی نێوان هەرێم و بەغدا

وەزارەتی دارایی و ئابوری دەڵێت، “بۆ هەمو لایەکی ڕون دەکەینەوە کە حکومەتی عێراقی فیدراڵ و وەزارەتی دارایی عێراق بەهیچ جۆرێک پابەند نەبون بە ڕێکەوتنی نێوان هەرێم و بەغداو جێبەجێکردنی یاسای بودجەی عێراق”.

ماف و شایستە داراییەکانی هەرێم بەپێی یاسای بوجە مانگانە زیاتر لە یەک ترلیۆن 384 ملیار دینارە

ئەوەشی خستوەتەڕو، “ماف و شایستە داراییەکانی هەرێمی کوردستان بەپێی یاسای بوجە مانگانە زیاتر لە یەک ترلیۆن 384 ملیار دینارە، تەنها بۆ موچەی فەرمانبەران و خانەنشیان و پێشمەرگە مانگانە 906 ملیار دینار لە یاساکە تەرخان کراوە”.

پێویست بو یەک ترلیۆن و 174 ملیار دینار بۆ هەرێمی کوردستان ڕەوانە بکات، ئەو بڕە پارەیەی نێردراوە پێچەوانەی یاسای بودجەیە

وەزارەتی دارایی و ئابوری دەشڵێت، “بەپێی ئینفاقی فیعلیش کە لە ئێستادا وەزارەتی دارایی عێراق لەسەر بنەمای تێکڕای خەرجی مانگانە کاری پێدەکات پێویست بو یەک ترلیۆن و 174 ملیار دینار بۆ هەرێمی کوردستان ڕەوانە بکات، ئەو بڕە پارەیەی نێردراوە پێچەوانەی یاسای بودجەو هەمو ئەو ڕێکەوتنانەیە کە لەنێوان هەردولا ئەنجامدراوە”.